Cartafueyos de Belenos (II)

El segundu númberu de la coleición Cartafueyos de Belenos ye tamién el catálogu d’una esposición, “La llingua de papel. 25 años de cartelismu n’asturianu (1974-1999)”, entamada pola Fundación Belenos –heredera del Conceyu d’Estudios Etnográficos Belenos– y la Casa Cultura Tiadoru Cuesta de Mieres. La muestra pudo vese ente’l 29 d’ochobre y el 12 d’avientu de 1999 nel Centru d’Arte Casa Duró. “La llingua de papel” vien a amosar una estaya más del procesu de normalización social del asturianu, nesti casu la que se dio, y se sigue dando entá, al traviés de la edición de cartelos propagandísticos de toa triba, concretamente nel periodu que va dende 1974, coincidiendo cola fundación de Conceyu Bable, hasta 1999, añu nel que s’entamó la esposición. Los testos del catálogu, nel que se reproducen 39  cartelos, son d’Ignaciu Llope y Begoña Nicieza.

Reseña bibliográfica:
VVAA (1999): La Llingua de Papel. 25 años de cartelismu n’asturianu (1974-1999). Colección “Cartafueyos de Belenos”, n º 2. Fundación Belenos, Uviéu; 32pp.