Yá comentamos más d’una vegada dende estes fueyes que dólmenes y castros son, nel maxín popular, obra de los Antiguos, los Xentiles o los Moros, entendiendo esta pallabra como s’emplegaba nel sieglu XVII nel valir del ‘non cristianu’, anque dempués estos míticos personaxes terminaríen por mecese colos moros históricos afuxentaos por Pelayo.
Equí prestaríanos facer un repasu a delles ayalgues arqueolóxiques verdaderes que na mitoloxía popular identifíquense con otros preseos, en delles vegaes fabulosos.
Asina los torquess, collares enterizos propios de la Edá del Fierro qu’algamaron gran prestixo ente los pueblos céticos, yeren tomaos por aldabes o tiradores d’arcones. Esta foi la interpretación que dio la xente a un torques y dos brazaletes d’oru atopaos en 11 de Marzu de 1935 en Vil.labona (Nieres – Tinéu) y asina nos lo contaba, el 24 d’Abril de 1997, Constante Fernández Braña de 73 años d’edá:
«Siendu Falo alcalde de Tinéu, atopóu Céfaro Fernández, tandu estaferiando cun más xenti’l pueblu tres argol.las cumu d’arcas que pesaron 496 gramos ya eran d’oru. Céfaro quería quedase cun el.las purque dicía que las atoupara él, ya la xente dicía que non, que cumu taban d’estaferia, pa quitar el tesu aou aparecieran, que tinía que repartir. Dichas argol.las l.levoulas pa casa ya tuvieran culgadas d’un escudil.leiru dous días ya dous nueites. Fueron José Moreño ya outro vicín que l.lamaban Pedro a dar parte a la guardia civil, que vieno a caballu ya entraron pula fuerza a pur el.las. Dempués nun se si-y dieran dusmil pesetas al que las atoupara, siendu alcalde de Tinéu, un tal Baltasar… esu dicían».
Dichos torques y los dos brazaletes desapaecen dempués cola guerra civil.
Con pallabres asemeyaes refierse Bances y Valdés, en Noticias históricas del concejo de Pravia (1911) al falar de l’ayalga, d’otru torques nel castru de doña Palla, tamién nomáu Palaciu de Doña Urraca nes lleendes: «(…) La magnificiencia de esta señora doña Palla se infiere muy bien del aldabón de oro, que se halló el año último pasado de 1804, cuya noticia dejamos dada, tratando de la Corte de Santianes de Pravia. Sólo añadiremos que se encontró en el Reguero de Riosico, a la parte del mediodía de estos palacios de doña Palla, quasi donde da fin la cava principal que divide la fortaleza del continente (…) El aldabón era liso, capaz de asirse con dos manos, un poco más grueso por el medio y con sus puntas o ejes volteados, que debían afianzarse en anillos clavados al cajón o ajuar donde haya servido (…)». El torques vendióse dempués n’Uviéu nuna puya, pesando nueve onces.
Marcelino Fernández y Fernández fala nel so llibru El Franco y su concejo (1898) de l’apaición de posibles torquess, unos en plata y otros n’oru, atopaos hacia 1813 en Miudes y Cartavio, a los que la xente identficaba con ases de calderos, anque él empérrase en ver na noticia los cachos de dalgún cinchu de castidá (ensin comentarios).
Eloy González Iglesias de 86 años, de Valentín (Cuaña), falábanos asina, en setiembre de 2000, d’otru torques atopáu:
«Ua argolla d’ouro apareceu sacando piedra d’un suqueiru no ano cincuenta y picu, na Llamella, en Valentín, colo que-yes dieron por ella l.levantaron as paredes de Casa Pola. Esa argolla tía uas cabecías nas puntas» (Valentín queda a kilómetru y mediu del afamáu Castru de Cuaña).
Tema aparte son dellos perendengues (n’oru o bronce) con forma media lluna que suelen identificase con ñarigones que llevaben los moros nes ñarres. Juan Manuel Calvo de 73 años d’edá, natural de Caliao (Casu), fálanos, el 7 de Mayu de 1998, d’uno d’ellos:
«Una areta, un ñarigón de los moros alcuntrelu yo va diez o quince años, p’allá, pa la Peña’l Castru, cuando baxábemos con un ramu debaxu’l regueru La Fonte Tenllada, pol Valle Valdefaces. Yera de bon material, como l’oru, un pocu averdosáu, debuxáu a lo llargu y macizu».
Curiosamente en Santibanes de Murias (Ayer) fálase de los Argol.laos o Argol.lones, unos que yeren, según la lleenda, descendientes direutos de los moros de Granada (?) y pa saber quien yeren, al convertise al cristianismu, colocáron-yos una argol.la. Andaben pel monte con cabres y oveyes y solía dicise: «Yes más feu qu’un argol.lán», porque dicíase que yera xente mui zarrapastroses.
Otres vegaes los míticos bolos colos que xueguen los moros resulten ser hachos de talón y anielles de bronce, como nel casu de los atopaos n’El Monte’l Riestru o El Monte’l Castru, n’Alava (Salas), mientres facíen una andecha p’arreglar un camín.
Tamién ye afayadizu comprobar como les cárcoves que faen les fuexes defensives de dellos castros, entiéndense como’l llugar onde xugaben a los bolos. Asina dalgunos topónimos falen de la bolera los moros, tal ye’l casu del castru qu’hai en La Punta’l Castiello, en Podes (Gozón). De xemes en cuando los cimientos de les cabañes circulares de los castros son pa la xente’l resclavu de los fornos de los moros.
Otros restos arqueolóxicos son los canales fechos polos romanos pa llevar l’agua nos llabores de la minería aurífera, nomaos Antigües y que son obra d’encantos o del mesmo diañu. Asina los resclavos de minería d’A Arruñada (Samartín d’Ozcos) fueren fechos por una apuesta, por una mora guapísima que tenía dos pretendientes y díxo-yos que se casaría con aquel que primero ficiera llegar l’agua de los ríos de San Cristobo y del de Pastur. Asemeyada historia cuéntase d’El Pozu Cillericos o Fullaricos, n’Ablaneda (Salas). Equí una princesa fai la mesma apuesta con tres pretendientes, ún d’ellos el diañu, feu y gorrumbu, que fai les tres antigües nuna nueche pa llevar l’agua dende El Pozu la Molina (La Espina) hasta Cillerios. En Teinás y Parada la Viecha (Cangas de Narcea) ye la propia mora la que fai la presa col tarugu la so madreña, pa llevar l’agua dende El RÍu Oural.lu, dende L’Altu’l Cabril, pa L.laciana, por riba Xenestosu, Brañafontes, L’Acebal y La Zapatina, en Purl.lei onde ta’l castru. La canal pa llevar l’agua llámase La Presa la Mora.
Dellos petroglifos son nes lleendes asturianes el resclavu de dalgún d’estos encantos, asina la cobertoria del dolmen d’A Gramela (Pradias – Ibias) llevóla na cabeza una moura que diba filando y dexó’l resclavu del so calcañu nunes peñes allegaes. Otres vegaes son los resclavos de la ferradura’l Caballu Blancu de Santiago saltando d’una peña a otra o les pisaes de la mula la Virxe. Asina en La Campa la Cruz, que queda pa Las Sinvueltas, a lo cabero de La Peña Sobia (Teberga) hai una piedra onde se dicía que taba marcada la rodiella’l lladrón (que persiguía a la Virxe), el calcañu’l zapatín de la Virxe y la ferradura la patada la mula, onde diba ella montada, al saltar dende ellí a El Picu San Xuan, pa La Riella.
Son, a fin de cuentes, esplicaciones fabuloses al mundu real de les nueses aldegues, onde maxa y realidá mecíense a partes iguales hasta va bien poco.
Alberto Álvarez Peña (Xixón/Gijón, 1966) es escritor, etnógrafo y dibujante, es autor de una treintena de libros y un buen número de artículos de temática etnográfica y en particular sobre la mitología y la tradición oral asturiana.
