Artículu punxose nel to cestu

Lady Gregory ya l’asturianu despistáu (Segunda parte)

Sillería de la catedral de San Patricio, Dublín. Semeya A. Sánchez Pozo.
Sillería de la catedral de San Patricio, Dublín. Semeya A. Sánchez Pozo.

Lady Gregory, Yeats ya otros activistes como los de la Gaelic League, defensores de la llingua del país, tuvienon ésitu a medies. Cien años depués de la independencia, los rapaces non solo s’espresen n’inglés senon que, amás, fáenlu con acentu americanu aprendíu en Youtube. En 2021 españó un escandalín cuando la prensa denunció el casu d’una pareya china, que la so solicitú pa nacionalizase refugáron-yla… Porque la apurrieron n’irlandés. Les autoridaes desixíen-yos que repitieran el trámite n’inglés.

Non, la segunda Renacencia Celta nun cuayó. Ente 1990 ya 1996 puedo citar cinco películes de tema irlandés ya escocés con un enfoque épicu o mitolóxicu. Son El Prau, de Jim Sheridan, en 1990; The Secret of Roan Inish, de 1994; Rob Roy ya Braveheart, dambes de 1995; Michael Collins, de 1996. Más allá d’esi añu, escasien la épica ya los emborrinaos misterios. Brave, de Pixar, foi estrenada en 2012; Black 47, en 2018.

La esceición ye la maraviosa “Triloxía Irlandesa” de Tomm Moore, tres películes d’animación que amecen realidad ya mitoloxía en tres estremaes dómines de la hestoria: El Secretu del llibru de Kells, de 2009, El Cantar de la Mar, de 2014 ya Lloberes [Moonwalkers], de 2020. Estes películes tienen el méritu añadíu de ser produciones irlandeses (inda que tean n’andecha con otros países) ya llibres del filtru hollywoodense que llastraba, por exemplu, a Brave de Pixar.

Moore conoz la materia: El Secretu del llibru de Kells ta atacáu de temes ya personaxes tomaos de la lliteratura medieval, adautaos al tonu d’una película infantil. Si Aisling, la encarnación femenina del país, ye nos mitos la amante del candidatu rexu, la que llexitima col so favor el poder del futuru rei, equí apaez como una neña. En cuenta de amante, ye la compañera de xuegos de Brendan, el neñu protagonista. En cuenta de enriscalu al tronu, ayudará-y a crear el maraviosu llibru de Kells.

La independencia costó sangre ya llárimes, pero el tesoru cultural que rescataron aquellos pioneros nun espoxigó tanto como merez. En 2024 hai en tol mundu munchos más amantes de El Señor de los Aniellos que del Ciclu del Ulster, munchos más fanáticos de la parafernalia vikinga que de los guerreros de la Caña Collorada. Ya cáfiame abondo, porque nin El Señor de los Aniellos nin la Saga de les Isllies Orcaes lléguen-yos a los calcaños al Ciclu del Ulster.

En 2014 tuve el privilexu de pasar unos meses trabayando n’Irlanda. Xubí el Croagh Patrick xunta pelegrinos descalzos, visité el cairn d’Áine en Limerick. Fotografié el Cuchulain Amorrientando na Oficina Central de Correos de Dublín. Alcontré munchos menos turistas de los que esperaba. Ya noté, perdayuri, un aquello d’indiferencia, de desdexu, hacia el pasáu ya la gloria. Quedóme grabau el comentariu d’un compañeru: “Agora que lo menciones, ye verdad que hai munches arpes nes nueses banderes ya logotipos. Pregúntome por qué será”.

Yo nun me esperaba un bardu en cada rotonda, declamando los vieyos cantares. En tolos países, la gente alabancia los tesoros nacionales mentanto dexa que garren polvu. Bien mirao, ¿Cuántos españoles tienen lleío el Quixote? Pero esto yara daqué distinto.

Nel Interné tengo atopaos irlandeses que ridiculizaben a los estranxeros, los que vivimos “estelaos” pol pasáu ya les lliendes del so país. Dellos, direutamente refugaben tol relatu identitariu que construyeron los nacionalistas de empiezos del XX. Como decía un comentariu de Quora, “Lady Gregory enxamás nun entendió Irlanda. Con razón cayó nel escaezu”. Otros, inda que se enchipaben del so padremuñu, de los poemas medievales ya de los mitos paganos, refugaben el celtismu: camentábenlu un conceptu confusu, que nun desplicaba nada sobre la identidá nin la hestoria d’Irlanda, ya negaban que naide nun tuviese derechu, más allá de les sos llendes, a apropiase de les sos histories nin de los dioses de los sos antepasados.

Énte esto, ¿qué puede faer un “estranxeru esteláu” como yo? El norte llamóme de siempres pero seique ellos, los norteños, diéronme cola puerta nes narices. Dende rapacín, los mis padres aprendiéronme que cuando te refuguen, nun hai que aneciar. Ya sin embargu…

…Sin embargu, yo creo inda nel celtismu: creo que los países de la oriella atlántica d’Europa tenemos una herencia a comuña, más o menos diluida pola romanización, que merez ser estudiada, conservada ya celebrada. Irlanda xuega un papel clave, siendo el país au esa herencia conservóse más bravo.

Otro problema ye que, depués de tantos años, siguen anoxándome enforma la televisión ya les emisores de radio españolas, el reggaetón, los programas de telerrealidá, les bodes ente toreros ya tonadilleres ya la riestra eterna de folixes absurdes, tomatinas, castellers, sanfermines, fallas, caravanas rocieras, ya’l Ministru de Cultura condecorando a la Virxen María.

Miro escontra’l norte, en parte, pa colar del sur. Busco sean-nós en Youtube ya guardo como un tesoru el maraviosu vídeu de RTÉ One, emitíu cola ocasión del cien cabudañu de la proclamación de la república. Entamaba col izar de la bandera dende cuatro fortines nes cuatro provincies d’Ulster, Leinster, Connacht ya Munster ya finaba na piedra de Fal, mi Dios, na puñetera piedra de Fal no cimero del cuetu de Tara. Arrespíngome cada vuelta que lo vexo. Quiciaves vaiga a un psiquiatra: eso de arrecer de patriotismu por un país nel que nun pasaste nin un añu de la to vida, nun puede ser normal.

Nun entiendo a los irlandeses pero a ellos la mio perplexidá impórta-yos un pimientu, como ye normal. Namás soi un extranxeru caciplón, un asturianu con problemas d’identidá, otra víctima de les tensiones cientru-periferia nel Reinu d’España. Yo aférrome a un pasáu míticu ya nel entretanto, Irlanda revisó les sos señes d’identidá, dexóse de la Ilesia Católica ya convirtióse nun de los países más prósperos d’Europa. Cuando viví ellí, los avisos del conceyu de vecinos nel mio edificiu taben en dos idiomes: non inglés ya irlandés, senon inglés ya polacu.

Los ochenta años pasaos de la hestoria de Europa desprestixanon la búsqueda de los raigaños nacionales, los héroes épicos ya l’amor pol folklor. Quiciabes Cuchulain de Muirthemne representa el nacionalismu, la complacencia ya l’ombliguismu, mentanto Finnegan’s Wake vien ser la rebeldía, la modernidá ya la universalidá. Quiciaves seya asina, anque a mín nun vais pillame lleendo Finnegan’s Wake nin muertu.

Sabe Dios. Seique ellos asocien la Renacencia de Lady Gregory col atrasu ya la represión que vivió Irlanda nes décadas darréu de la independencia. Quiciabes la charanga ya pandereta que a mín tarrécenme n’España nun seyan tan estremaes del trébol de cuatro fueyes,los carteles de Guinness ya les ñoñeces trasnochaes de El Home Tranquilo. A lo meyor, mentanto escribo esto, hai un rapacín de Galway sintiendo cante jondo pa afuxir del tin whistle, o lleendo el Romancero Gitano de Lorca col mesmu ablayu col que yo leí Cuchulain de Muirthemne.

En 2023, la plataforma Herstory foi quién que’l día de Santa Bríxida, el primeru de febreru, fora declarao fiesta nacional na República d’Irlanda. Brígida o Brigit, en parte santa cristiana ya en parte diosa celta, convirtióse nos últimos años nuna heroína feminista. Nun ta sola: abonden los grupos paganos basados nos vieyos dioses de la lliteratura irlandesa medieval. Dellos, los llamaos reconstruccionistas, son enforma rigurosos. Los sos miembros lleen con pricuru les últimes teorías d’hestoriadores ya arqueólogos, faciendo por comprender lo meyor que seya humanamente posible les creyencies de los antiguos celtas. Tampoco nun tienen problema en mandase del folklore. ya eso dame esperances.

Va cien años, los vieyos mitos sirvieron al nacionalismu. Gúei mándense d’ellos les feministes ya los neopaganos. Nin Cú Chulainn, nin Deirdre nin Brigit van a caer nel escaezu. El mitu ya la poesía son potentes de más pa eso.