L’Ayuntamientu d’Uviéu apurrió’l Premiu Internacional de Folclore “Martínez Torner” al nuestru Presidente d’Honor, Lisardo Lombardía, una de les figures más influyentes na proyección internacional de la música tradicional asturiana y de les cultures del Arcu Atlánticu.

Nacíu en La Pola Llaviana en 1955, Lisardo destacó demientres décades como divulgador, investigador y xestor cultural. Cofundador del Coleutivu Belenos, impulsor d’iniciatives como Nueches Celtes, El Festival Arpa Celta o Uviéu Folk, y direutor xeneral del Festival Intercélticu de Lorient ente 2007 y 2021, la so trayeutoria foi clave p’allugar a Asturies nel mapa internacional de la música de raigón.

El premiu reconoz nun sólo’l so trabayu de promoción cultural, sinón tamién el so compromisu pa coles identidaes musicales minoritaries, la investigación etnográfica y l’aniciu d’espacios d’alcuentru ente tradiciones celtes.

La entrega del gallardón va tener llugar el 26 de payares n’Uviéu, nun actu entamáu pola Escuela Municipal de Música Tradicional. Un reconocimientu más que merecíu pa una vida dedicada a la cultura, la memoria y la música del pueblu.