Trátase d’una historia qu’atopamos en casi tolos conceyos asturianos. El plantegamientu ye’l que sigue. Nun sitio hai una piedrona que tien escritu «Dame la vuelta y verás lo que debaxo de min alcontrarás». La xente barrunta que baxo’l morrillu hai un tesoru de los antiguos, asina que pónense a escargachar pa dar la vuelta a la piedrona, en dellos casos ta tol pueblu trabayando, n’otres versiones tien que ser un paisanu, un forzudu, el que-y de la vuelta a la llabanona. Cuando por fin consiguen da-y la vuelta ven que por atrás tien otra iscrición de chancia pa colos paisanos que pon: «Gracies a dios y allabáu que ya toi del otru llau» quedando la xente con una cuarta ñarices y ensin tesoru nengun dempués de tar trabayando dellos díes o selmanes.
En Piñeres (Aller) la iscrición de la piedra ponía: «El que vuelta me diera, bona fortuna tuviera» y pol otro llau: «Gracies a dios y al aráu que ya toi del otro llau». En Baselgas (Grau) esa piedrona taba nel Castiellu, nun sitiu que llamen L’Aguilar, cerca d’un posible torruxón de vixilancia’l valle, y trayía escritu: «Si la vuelta me dieres, el tiempu nun perdieres». En Priendes (Carreño) dicíase que nel torruxón románicu qu’elli ta y que s’atribuye a los míticos moros, había un morrillu embucháu na paré que trayía: «Dame la vuelta y verás lo que detrás de mi hallarás». Como ye de suponer allá foi la xente de la rodalada a trabayar p’atopase col lletreru del otro llau que ponía: «Gracies a dios y alabado que ya toi del otro lado». En Quintanal (Miranda) foi una xente que taba curiando les oveyes los qu’atoparen una piedrona que trayía: «Bendito seya’l que la vuelta me dea», fueren a llamar a más xente pa voltiala y ponía: «Bendito y allabao que ya ti del otro lao». En Cuña (Teberga) contábase que tala piedra taba nun sitiu que llamen El Corral de Turones, nesti casula iscrición diz: «El que me dea’l valtu nun perderá’l ratu» p’atopase después col: «Benditu y alabáu que toi del otro llau». En Santu Milláu (Allande) el morrillu taba p’hacia Tamagordas. Nel Altu Las Zreizales, p’arriba Vil.lare Vilbas (Sumiedu), dando vista a La Braña lus Tres Chozos, tamién había otru d’estos morrillos.
Nel Faidal de Salas foi un home que taba llendando les vaques el que vió la piedra grabada y poco a poco foi trabayándola por baxu pa poder valtiala, hasta qu’un día cayó un bastiu d’agua y la piedra argayó, esfanó, y pudo ver qu’embaxo d’ella nun había tesoru nengún, pero la piedra ponía la iscrición de chancia que yá sabemos.
Anque trátase d’una historia de tradición oral, dalgunes vegaes apaez venceyada a l’ayalga de dalguna llábana votiva o funeraria romana.
Na Ponte de Purtiel.la (Cangas de Narcea) hai una piedra escrita ya mui esborriada, quiciabes del sieglu XV o XVII, embuchada na muria. Creyíase que taba escrita n’árabe y una vez allegóse per ellí un paisanu que quixo axustar cola xente’l molín de Purtiel.la pa sacala d’ellí y coyer el tesoru d’oru que suponíen había tres la llábana. En Berodia (Cabrales) cuéntase que la piedra burllona quedaba subiendo pa La Molina, pal Colláu Llinares y que trayía escritu un lletreru que dicía: «Si vuelta me dieras, alcontraras debah.u lo que quixeras».
La riestra llugares ye abonda pero basten bien estes ringleres pa decatanos de los arramada que ta esta historia pola nuesa xeografía.
Alberto Álvarez Peña (Xixón/Gijón, 1966) es escritor, etnógrafo y dibujante, es autor de una treintena de libros y un buen número de artículos de temática etnográfica y en particular sobre la mitología y la tradición oral asturiana.
