Artículu punxose nel to cestu

L’Anuariu de la música asturiana recueye delles collaboraciones de miembros de Belenos

Hai unes selmanes Goxe Producciones asoleyaba l’Anuariu de la Música Asturiana 2025. Y, como ye vezu, nél recuéyense delles collaboraciones de miembros de la Fundación Belenos. Asina, Berto Peña descúbremos “Dellos músicos populares del conceyu d’Uviéu”, nomes munchos yá escaecíos de xente que tocaba peles romeríes del conceyu; Ignaciu Llope firma “Tradición y folclor: de la voz de la tierra a la voz del pueblu”, un averamientu a la visión que’l filósofu y políticu italianu Antonio Gramsci tenía sobre la cultura y música populares; y Daniel Cueli firma trés cróniques nes que recueye’l percorríu de la música celta n’Asturies demientres l’añu pasáu: con “Un añu importante pa la gaita” fae repasu de los asocedíos más importantes usando de filu conductor el nuestru instrumentu más emblemáticu; en “Asturies, escenariu celta” repasa los conciertos que n’Asturies dieron grandes grupos ya intérpretes del Arcu Atlánticu (Carlos Núñez, Altan, Skolvan, Rura, Malin Lewis…) y, por último, fala de la presencia en Xixón de los responsables del Celtic Connections y del Festival Interceltique de Lorient p’asistir al II Alcuentru Profesional Música en Rede.